Pi ’na goccia r’acitu 

di Riccardo Maria Bonomo

Leggi in italiano

Scopri il documento collegato

Iu ’cci retti ’a libertà, e iddi mi ficiru ’a festa.

Mi canusciti comu ’a vecchia r’acitu, ’a màgara, ’a strega, ma nuddu, nuddu sapi cu sugnu pi ddaveru, e picchì fici chiddu ca fici. Ma, puru si nuddu mi voli ascutari, puru si nuddu mi po’ ’cchiù sentiri, rintra ’sta notti ca ’un agghioinna mai, rintra stu buio fitto, comu ’na cupiatta nivura nivura, ca cummogghia i sogni e affuca i puimmuna, comu ’nu cielu senza stiddi, senza luna, cumpagna ’ru scantu, iu vogghiu parrari.

’U sacciu, chiddu ca stati pinsannu: «Idda s’u meritò ri fari sta fine», «Ammazzò e si fici ammazzari», «’U riavulu si l’appi a puittari». I chistiani tutti bravi su’ a parrari: ma vuatri un’a viristivu ’a facci ri ’ddi fimmini, no. Quannu trasianu ’a me casa, m’arrioiddo bonu, aviano ’a facci sutta supra, l’occhi vacanti comu puzzi asciutti, ’i manu trimuliavanu comu foglie sicchi carute ’ri l’aibbori, susciate ’ru ventu: vuatri mi chiamate riavulu, ma idde, quannu affacciava, ca pelle ’ra facci caruta e i vrazza moddi, comu s’avissiru l’ali, ci paria ca virianu un ancilu o ’a Maronna. «Pi fauri», ricianu, quaittiannusi, «iddu, ’u porcu, l’a fari spariri», oppuru «’Dda bestia ’i me maritu mi runa lignati ’ra matina ’a sira. Si parru, mi pigghia a lignati, s’un parru, mi pigghia a lignati. S’u vasu, mi ’runa ’na boffa, si ’cci fazzu na carizza, mi strinci ’a manu facennu comu pi turcilla, si ’cci ricu, tutta cuntenta e allicchittata, cu l’occhi c’hanno chianciuto ’ra felicità, c’aiu ’accattari un picciriddu, iddu mi runa cavuci pi farimillu perdiri. – Cu cu ’u facisti? – un cavuciu – A ’cu cia rasti? – n’avutru cavuciu, ’cchiù forti – ’Aviti a morriri tu e ’stu picciriddu! – e ’un a finisci ’cchiù ’i rari cavuci». E a mia mi passiru piatusi, cu ’ddi occhi chini ’i raggia, cu ’ddi macchie nivuri ’nni vrazza, cu ’ddi vucchi russi, e bunci, bunci comu ’u cori ’ri ’ddi criaturi… 

Vinniru tutti ’nni mia pi l’acitu: fimmini, masculi… E iu c’avia a fari? Chi c’avia a diri? Iu ’cci retti ’a libertà, e iddi s’a pigghiaru, e ’cci ficiru ’nsoccu vulianu.

Acqua, pirocchi, acitu…

Acqua, pirocchi, acitu…

Acqua, pirocchi, acitu…

’Un ’u rici puru ’u Signuruzzu, ca i chistiani sunnu liberi, e puru Iddu ’un po’ addicirriri pi l’avutri, picchì ognuno s’avi a scegliri ’a ’so sorti?

Iu ’cci retti ’a libertà, e iddi mi ficiru ’a festa.

Ultima modifica: 31 Maggio 2024